اُمّئِ نکتہ داں کلیمِ سخن
جانِ علم و عمل حکیمِ زمن
رونقِ چہرۂ گل و گُلزار
آبرُوئے رُخِ بہارِ چمن
وجہِ تخلیقِ بزمِ کون و مکاں
وجہِ تزئینِ گلستانِ زمن
صبحِ فِطرت کا اوّلیں پرتو
آفتابِ قِدم کی پہلی کرن
سازو سامانِ زندگی سے تہی
اور ماتھے پہ کوئی بَل نہ شِکن
کوئی دیکھے تو شانِ استغنا
کوئی سیکھے تو سروری کا چلن
ظُلمتیں دہر کی ہُوئیں رُخصت
اُٹھ گئی جب بھی رُخ سے بُردِ یمن
قدِ مَوزُوں نے اَور چمکا دی
تیرے دستار و پَیرہن کی پھبن
اعظؔم اِعجازِ نعت ہے ورنہ
کہاں مَیں اور کہاں یہ بزمِ سخن
شاعر کا نام :- محمد اعظم چشتی
کتاب کا نام :- کلیاتِ اعظم چشتی