ذکر دی بزم سجاون دی عادت پئے گئی اے
نعتاں سنن سناؤن دی عادت پئے گئی اے
خلق نبی دیاں گلاں کر کر ویریاں نوں
مینوں یار بناؤن دی عادت پئے گئی اے
مٹھڑے مٹھڑے گیت نبی دے سن سن کے
اپنا آپ لٹاون دی عادت پئے گئی اے
پتہ نہیں یار نے کیہڑے ویلے آ جانا
پلکاں یار وچھاون دی عادت پئے گئی اے
جنہاں نے اک وار مدینہ دیکھ لیا
مڑمڑ طیبہ آون دی عادت پئے گئی اے
بوہے کھول کے سوہنے نبی دیاں یاداں دے
اپنا من پرچاون دی عادت پئے گئی اے
دیکھ کے خلق مدینے والے سوہنے دا
جگ دے بھار ونڈاون دی عادت پئے گئی اے
کملا رملا سمجھ کے بولیاں مارو ناں
پڑھیا سبق بھلاؤن دی عادت پئے گئی اے
سن لیندا اے اوہ تے چپ چپیتیاں دی
تینوں کیوں کرلاؤن دی عادت پئے گئی اے
ایہہ ہے صدقہ یار نیازی چنگیاں دا
مندیاں نال نبھاؤن دی عادت پئے گئی اے
شاعر کا نام :- عبدالستار نیازی
کتاب کا نام :- کلیات نیازی