فضا میں اُن کے ہونٹوں کی صدا ہے

فضا میں اُن کے ہونٹوں کی صدا ہے

مدینے کی سحر ہے اور میں ہوں

---

حجاب درمیاں کوئی نہیں ہے

محمد کی نظر ہے اور میں ہوں

---

حرا سے سبز گنبد تک مسلسل

سفر اندر سفر ہے اور میں ہوں

---

در دل پر صدائے اسم احمد

مرا دامان تر ہے اور میں ہوں

---

کبھی قدسی، کبھی جامی و اقبال

تماشائے ہنر ہے اور میں ہوں

---

سکوت و صوت کی منزل سے آگے

تقاضائے دگر ہے اور میں ہوں

---

مرے اشکوں میں تصویر بلالی

محبت کا ہنر ہے اور میں ہوں