مبارک فضل بھائی کو عجب ہی نورچھایاہے
شبِ اَسرا کے دولہا نے انہیں دولہا بنایا ہے
جگایا تم نے سنت کو مٹایا تم نے بدعت کو
لہٰذا سو شہیدوں کا ثواب و اَجر پایا ہے
کیا ناراض سب کو اور راضی کرلیا رب کو
غرض کہ اس تجارت میں نفع کافی کمایا ہے
رسول اللہ تم سے خوش ہیں اور اللہ بھی راضی
عمل سے تم نے اُمت کو سبق اَچھا پڑھایا ہے
یہ شادی خانہ آبادی مبارک ہو مبارک ہو
کہ اس شادی میں حضرت فاطمہ زَہرا کا سایہ ہے
وہ آگے نعت خوانی اور دُرودِ پاک کی کثرت
خدا و مصطفیٰ کے ذِکر سے شیطاں بھگایا ہے
یہ آوازیں یقینا سبز گنبد میں بھی پہنچی ہیں
اَحادیثِ نبی نے ہم کو یہ مژدہ سنایا ہے
جہیزِ مختصر سے فاطمہ کی یاد تازہ کی
ولیمہ کی ضیافت میں عجب ہی لطف آیا ہے
دُعا سالکؔ کی یہ ہے فضل پر فضلِ الٰہی ہو
رہے یہ درس قائم جس سے سب نے فیض پایا ہے
شاعر کا نام :- مفتی احمد یار نعیمی
کتاب کا نام :- دیوانِ سالک