حسین زُبدہء نسلِ رسول ابنِ رَسُول
علی کے لاڈلے زہرا کے پھُول ابن رَسُول
حسن حسین ہی اَبْنَاءَنَا کے ہیں مِصداق
کہے گا اِن کو ہر اک با اُصول، ابنِ رَسُول
رواں ہر آنکھ سے اطفالِ اشک پُر سے کو
تِرے لیے دلِ عالم مَلُول، ابنِ رَسُول
ترا وجود ہے خود آیۃٗ مِّنَ الآیات
ہے کربلا تِری شانِ نُزول ، ابنِ رَسُول
اگر تُو دوشِ رسالت پہ کھیلنا چاہے
تو دیں رَسُول بھی سجدے کو طول ابنِ رَسُول
ترے خلوصِ عمل سے سبق نہ سیکھ سکے
یہ دِیں فروش، یہ اُجرت وُصول ، ابنِ رَسُول
رَسُول بند نہ کرتے اگر یہ دروازہ
خدا گواہ تُو ہوتا رَسُول ابنِ رَسُول
تجھے عَدُو بھی ملا تو عجیب سِفلہ مزاج
نہ کوئی شرم، نہ کوئی اُصول ، ابنِ رَسُول
یہ قیصری تِرے پائے غَیُور کا دھوون
یہ سِیم و زر تِرے قدموں کی دُھول، ابنِ رَسُول
ہے تیرا بیتِ امامت مِرے جنوں کا مطاف
جبینِ عجز کا سجدہ قُبول ، ابنِ رَسُول
نصیؔر کو نہ اُٹھانا اب اپنی چوکھٹ سے
بحق ِ فاطمہ زھرا بَتُول ، ابنِ رَسُول
مہک اُٹھا ہے نصیؔر اِن کے دم سے باغِ جہاں
حسن حسین ہیں زہرا کے پھُول ، ابنِ رَسُول
شاعر کا نام :- سید نصیرالدیں نصیر
کتاب کا نام :- فیضِ نسبت