سَر میں ہے نوکِ سناں ‘ جسم ہے پیکاں پیکاں
خون ہی خون ہے بکھرا ہوا میداں میداں
کس کی آنکھیں ہیں کہ بجھ کر بھی ہیں مشعل مشعل
کس کا چہرہ ہے کہ کٹ کر بھی ہے رخشاں رخشاں
یہ شہادت ہے اس انساں کی ‘ کہ اب حشر تلک
آسمانوں سے صدا آئے گی انساں انساں !!
یہ اُسی فخرِ دو عالم ؐ کا جگر گوشہ ہے
جس کی رحمت کبھی بٹتی رہی داماں داماں
کیا قیامت ہے کہ پھولوں سے بھی کمسن بچے
چہرے ماؤں کے تکے جاتے ہیں حیراں حیراں
وہ جو حق کے لیے مر جانے کا فن جانتے ہیں
ان مراحل سے گزر جاتے ہیں آساں آساں
شاعر کا نام :- احمد ندیم قاسمی
کتاب کا نام :- انوارِ جمال