درِ مُصطفٰے سے جو نسبت نہیں ہے

درِ مُصطفٰے سے جو نسبت نہیں ہے

کسی بھی دُعا کی اجابت نہیں ہے

---

عبث اُن کا دعوٰی ہے ایمان کا بھی

جنہیں مُصطفٰے سے محبّت نہیں ہے

---

عمل ، گویا رُوحِ عمل سے ہے خالی

جو پیشِ نظر اُن کی سیرت نہیں ہے

---

ہے طاعت خُدا کی بھلا کیسے ممکن

اگر مُصطفٰے کی اِطاعت نہیں ہے

---

پلٹنا مدینے کی مہکی گلی سے

کوئی اِس سے بڑھ کر قیامت نہیں ہے

---

درِ مُصطفٰے کی ملے خاک رُوبی

تو اُس جیسی کوئی سعادت نہیں ہے

---

رکھے دل میں آلِ نبی سے عداوت

بڑی اِس سے کوئی شقاوت نہیں ہے

---

شہادت ، شہیدوں کے ماتھے کا جُھومر

پہ شبّیر جیسی شہادت نہیں ہے

---

زمانے میں قاری کروڑوں ہیں لیکن

کسی کی سِناں پر تلاوت نہیں ہے

---

جلیل ایسا ایماں کہاں معتبر ہے

جو آلِ نبی سے مودّت نہیں ہے