دیکھیے جذب محبت کا اثر آج کی رات

دیکھیے جذب محبت کا اثر آج کی رات

اپنے محبُوب کو بُلوا لیا گھر آج کی رات

---

آئی آواز ذرا اَور قریب آجاؤ

منتظر ہَے کوئی آغوشِ نظر آج کی رات

---

چھُپ کے بیٹھا ہے سر شام کِسی گوشے میں

تابِ جلوہ کہاں رکھتا تھا قمر آج کی رات

---

خالقِ عرش سرِ عرش بصد رعنائی

جلوہ فرما ہے یہ اندازِ دگر آج کی رات

---

کوئی سمجھے بھی تو کیا کوئی نہ سمجھے بھی تو کیا

اللہ اللہ یہ توقیرِ بشر آج کی رات

---

جلد لَوٹ آئیے سرکار کہ یہ رات کٹے

ورنہ مشکل نظر آتی ہے سحر آج کی رات

---

خود بخود اٹھتے گئے سارے حِجابات اعظؔم

جس طرف سے بھی ہوا اُن کا گذر آج کی رات