جس کدے کسے دی نال تیرے آشنائی ہوگئی
اوہ خدا دا ہوگیا دنیا پرائی ہوگئی
تیریاں شاناں توں صدقے والیا بطحا دیا
توں خدا دا ہو گیوں تیری خدائی ہوگئی
دور رہندی اے سدا اوہناں توں رحمت رب دی
جنہاں بدبختاں دی سوہنے تو جدائی ہوگئی
میرے روون تے اوہدی رحمت نوں ہس دا ویکھ کے
میریاں عیباں توں صدقے پارسائی ہوگئی
عقل سدرہ تے کھڑی سوچاں ای رہ گئی سوچدی
عشق دی محبوب دے گھر وچ رسائی ہوگئی
جد وی کیتی میں ظہوریؔ کملی والے دی ثنا
کر لیا اکھیاں وضو دل دی صفائی ہوگئی
شاعر کا نام :- محمد علی ظہوری
کتاب کا نام :- صفتاں سوہنے دیاں