کوئی محبُوبِ کِبریا نہ ہوا

کوئی محبُوبِ کِبریا نہ ہوا

کوئی تجھ سا ترے سوا نہ ہوا

---

روزن دل سے جھانکنے والے

آج تک تیرا سامنا نہ ہوا

---

کون ہے اُس کا ، تُو نہیں جس کا

اور کس کا ہے جو ترا نہ ہوا

---

حق نے کب تیری بات ٹالی ہے

کون سے دن ترا کہا نہ ہوا

---

تجھ پہ کیا کیا ستم نہ ڈھائے گئے

تجھ سے کس شخص کا بھلا نہ ہوا

---

ہم پہ کتنا وہ مہرباں ہوگا

جس سے دشمن کا دل بُرا نہ ہوا

---

حاصلِ بندگی تھا وہ سجدہ

جو تری ذات کو روا نہ ہوا

---

ضبط کے تار ٹوٹ ٹوٹ گئے

جب کوئی قافلہ روانہ ہوا

---

حسرتیں اُڑ گئیں دھواں بن کر

لب کُشائی کا حوصلہ نہ ہوا

---

شعر تو شعر قُرب میں اُن کے

ہم سے اظہارِ مدّعا نہ ہوا

---

سبز گُنبد پہ کیا نظر پڑتی

سر تو دہلیز سے جُدا نہ ہوا

---

التجا کی زباں ہے نعتِ رسُول ؐ

اس میں شامل کبھی گِلہ نہ ہوا

---

تھی یہی غایتِ حیات اعظؔم

پھر بھی مِدحت کا حق ادا نہ ہوا