میرے سوہنے دی مثال تے نظیر کوئی ناں
نبی پاک جہیا نور تے منیر کوئی ناں
نبی اُمتاں دے باپ ہندے بھائی جان نئیں
علی باہجھ میرے مصطفیٰ دا ویر کوئی ناں
قید دل جیویں آمنہ دے لال کر لئے
انج دل کیتے کسے نے اسیر کوئی ناں
مکھ ازل دی سویر میرے نبی پاک دا
زُلف أبد والی شام دی اخیر کوئی ناں
اوہدا پیر اے شیطان سارا جگ جان دا
جنہے منیاں جہان وچ پیر کوئی ناں
جانشین اللہ پاک دے حضور پاک نے
الله پاک دا امیر تے وزیر کوئی ناں
صائم آقا دی گدائی جہنوں بُری لگدی
اوہ تے اللہ دے وی بُوہے دا فقیر کوئی ناں
شاعر کا نام :- علامہ صائم چشتی
کتاب کا نام :- کلیات صائم چشتی