ملا جس کی نسبتوں سے یہ عروج آگہی کو

ملا جس کی نسبتوں سے یہ عروج آگہی کو

اسی در کی آرزو ہے مرے ذوق ِ بندگی کو

---

مرا دین اور دنیا نو الگ الگ نہیں ہیں

میں سمجھ رہا ہوں سب کچھ ترے در کی حا ضری کو

---

میرے آنسوؤں کی قیمت نہ سمجھ سکے گی دنیا

مجھے کیا دیا ہے تو نے یہ بتاؤں کیوں کسی کو

---

وہ کریم جس کا دامن ہے عدو پہ بھی کشادہ

میں خراب ہوں تو کیا ہے مری لاج ہے اسی کو

---

ترا غم مسرتوں کا ہے ابد قرار ضامن

شب و رو ز مل رہا ہے نیا حسن زندگی کو

---

کوئی نامراد ہو کر ترے آستاں سے جائے

نہ ہوا کبھی گوارا تری بندہ پروری کو

---

اے ازل ابد کے ساقی ابھی کچھ کمی ہے باقی

وہ نظر اٹھا جو بھر دے میرے غمِ تشنگی کو

---

وہ شعور چاہتا ہوں وہ نگاہ چاہتا ہوں

تری روشنی سمجھ لے جو ہر اک روشنی کو

---

وہ خدا نعتِ سرورؐ سے بُہت ہی خوش ہے خالدؔ

وہ نکھارتا رہے گا مرے حُسنِ شاعری کو