مصطفیٰ، شانِ قُدرت پہ لاکھوں سلام
اوّلیں نقشِ خِلقت پہ لاکھوں سلام
مِیرِ جیشِ رُسُل، اُمّی و عقلِ کُل
صدرِ بزمِ رسالت پہ لاکھوں سلام
قائلِ وحدَہٗ لَا شریکَ لَہٗ
ماحیِ شِرک و بدعت پہ لاکھوں سلام
چاکِ دِل سِل گیا، آسرا مِل گیا
گردشِ چشمِ رحمت پہ لاکھوں سلام
گِردِ چہرہ وُہ اک ہالہٗ تمکنت
والضّحٰی کی صباحت پہ لاکھوں سلام
بھِینی بھِینی وہ خُوشبوئے زُلفِ دوتا
ایسی بے مثل نکَہت پہ لاکھوں سلام
آنکھ کو دے گیا زِینۂ اِرتقا
سبز گُنبد کی رِفعت پہ لاکھوں سلام
دست کی دستگیری پہ دائم دُرود
پاؤں کی استقامت پہ لاکھوں سلام
بھِیڑ میں چُوم لِیں شاہؐ کی جالیاں
اے نظر! تیری ہّمت پہ لاکھوں سلام
وہ حلیمہؓ جو ہے ثانیِ آمِنہؓ
اُس کے لمحاتِ خدمت پہ لاکھوں سلام
ازل ازل تیرے منصب پہ لاکھوں دُرود
تا ابد تیری بِعثت پہ لاکھوں سلام
نقشِ پا کے نگیں، جن کو تَر سے زمیں
چال کی زیب و زینت پہ لاکھوں سلام
کِس کی چوکھٹ پہ تُو دے رہا ہے صدا
اے گدا! تیری قسمت پہ لاکھوں سلام
شانۂ اقدسِ شہؐ پہ بے حد دُرود
مُہرِ ختمِ نبّوت پہ لاکھوں سلام
حوصلہ دینے آئے گی جو قبر میں
ایسی نادیدہ صورت پہ لاکھوں سلام
کھو گیا کِس کا حُسنِ گُزر دیکھ کر
نقشِ پا! تیری حیرت پہ لاکھوں سلام
اُن کے رُوپ اور رنگت پہ رنگیں دُرود
اُن کی شکل و شباہت پہ لاکھوں سلام
گردشیں تھم گئیں، محفلیں جم گئیں
کملی والےؐ کی نسبت پہ لاکھوں سلام
ایک دو تین کیا، لاکھوں سَر کٹ گئے
اُن کی منصوص عّزت پہ لاکھوں سلام
عُمر بھر غم جو اُمّت کا کھاتا رہا
ایسے غم خوارِ اُمّت پہ لاکھوں سلام
کل کرے گی جو شورِ قیامت فرو
اُس دل آویز قامت پہ لاکھوں سلام
جس کو پاکر حلیمہؓ غنی ہوگئی
آمنہ! تیری دولت پہ لاکھوں سلام
دیکھنے والی آنکھوں پہ پیہم دُرود
مرکزِ دید، صُورت پہ لاکھوں سلام
اُن کی آمد کا سُن کر جو ہو گا بپا
ایسے شورِ قیامت پہ لاکھوں سلام
زینبؓ و مرتضیٰؓ پھر حسینؓ و حسنؓ
اور خاتونِؓ جنّت پہ لاکھوں سلام
چار یارانِؓ حضرتؐ پہ ہر دم دُرود
اِن کے دورِ خلافت پہ لاکھوں سلام
شاہِ بغداد، غوث الورٰی ، مُحیِ دِیںؒ
آبروئے طریقت پہ لاکھوں سلام
کیجئے بند آنکھیں نصیرؔ اور پھر
بھیجئے اُن کی صورت پہ لاکھوں سلام
شاعر کا نام :- سید نصیرالدیں نصیر
کتاب کا نام :- دیں ہمہ اوست