نعت بھی ہے صورتِ درود
اس پہ بھی ہے حسرتِ درود
خیر کی ہے قدرِ معتبر
سب کے حق میں رحمتِ درود
ہمنوا خدا کے ہوگئے
جب ملی سعادتِ درود
بچ گئے ہیں ہر عذاب سے
ہم ہیں اور جنتِ درود
تیر ہیں جو غم کے بے شمار
ڈھال ہے تلاوتِ درود
یہ ہے مشکلوں کی شہ کلید
اے خوشا محبتِ درود
موجبِ قبولِ ہر دعا
وردِ با کرامتِ درود
مستقل ہے اس کا آسرا
دائمی ہے لذّتِ درود
ہے بھلائی اس میں خَلق کی
عام کیجے دعوت درود
ہے قلیل اب تو زندگی
اب تو کیجے کثرتِ درود
زندگی میں حسن و خیر ہو
اے خدا بدولتِ درود
پھیلتی ہی جائے سُو بسُو
جاں فروز نکہتِ درود
یا الہٰی حشر تک رہے
زیست میں حرارتِ درود
ہو محیط کائنات پر
فیضِ بے نہایت درود
تائب اک خزانہء ثنا
بن گئی ہے دولت درود
شاعر کا نام :- حفیظ تائب
کتاب کا نام :- کلیاتِ حفیظ تائب