اوہ نوری مکھڑا ویکھاں گا کدوں تیک
خدا جانے میں سہکاں گا کدوں تیک
نظر ہووے گی کد حالت تے میری
غماں دے وار جھلّاں گا کدوں تیک
منوں روگاں نے کر دتا اے عاجز
ایہہ جُثّہ میں دھریکاں گا کدوں تیک
کدوں رحمت لوے گی وچ کلاوے
میں اکلاپا ہنڈاواں گا کدوں تیک
ایہہ عزت آبرو جس ناں دے نا ل اے
میں جان اس ناں توں واراں گا کدوں تیک
اداسی مار ای دیوے نہ ایتھے
نبیؐ دے در تے اپڑاں گا کدوں تیک
اقامہ لبھے روحانی وطن دا
میں ایہہ ارمان پالاں گا کدوں تیک
بلاندے نیں ترے سرکارؐ تینوں
سنیھا ایہہ اڈیکا ں گا کدوں تیک
ملے تھاں قبر لئی تائب مدینے
میں اینا پاک ہوواں گا کدوں تیک
شاعر کا نام :- حفیظ تائب
کتاب کا نام :- کلیاتِ حفیظ تائب