راہِ نبیؐ میں ذوقِ وفا میرے ساتھ ہے

راہِ نبیؐ میں ذوقِ وفا میرے ساتھ ہے

ہر لمحہ بے خودی میں خدا میرے ساتھ ہے

---

بخشش کا وعدہ اُن کا جو تھا، میرے ساتھ ہے

لُطفِ شفیعِؐ روزِ جزا میرے ساتھ ہے

---

تنہائیوں کا غم نہیں طیبہ کی راہ میں

مانندِ سایہ، راہ نما میرے ساتھ ہے

---

اب اور اِس جہان میں کیا چاہیے مجھے

میرے بڑوں کی نیک دُعا میرے ساتھ ہے

---

بے فکر زندگی کا سفر کر رہا ہُوں مَیں

ہر گام پر کسی کی عطا میرے ساتھ ہے

---

دل باوجودِ گردشِ دوراں ہے مطمئن

دن رات عشقِ آلِؓ عبا میرے ساتھ ہے

---

اُڑتا پھروں گا روضۂ اقدس کے آس پاس

اُس دامنِ کرم کی ہَوا میرے ساتھ ہے

---

یاد خدا و ذِکر نبیؐ، فکرِ آخرت

راہِ سفر میں صدق و صفا میرے ساتھ ہے

---

تنہا نہیں ہُوں اُن کی لگن میں کسی گھڑی

ہر وقت میرے دل کی صدا میرے ساتھ ہے

---

سارا جہاں بھی درپئے آزاد ہو تو ہو

کچھ غم نہیں نصیرؔ خدا میرے ساتھ ہے