رُلا دیتی ہے پاکیزہ مدینے کی ہوا مجھ کو

رُلا دیتی ہے پاکیزہ مدینے کی ہوا مجھ کو

بہت ہی یاد آتے ہیں مرے خیر الوریٰؐ مجھ کو

---

مَیں اس کے ایک اک پتھر سے اپنے دل کو بہلاؤں

بُلا لے کاش اپنے پاس ہی غارِ حرا مجھ کو

---

ادھر آؤ ادھر بیٹھو مجھے دیکھو مجھے چومو

مدینے کی مقدس خاک دیتی ہے صدا مجھ کو

---

کبھی نوکر بنا کر ہی بٹھالیں اپنے قدموں میں

رسولِ دوجہاں میرے امام الانبیاء مجھ کو

---

وہ خالی تو نہ چھوڑیں گے وہ خالی تو نہ موڑیں گے

مگر دستِ کرم سے اُنؐ کے آتی ہے حیا مجھ کو

---

عجب اس کی سخاوت ہے عجب اس کی عنایت ہے

مرے ہونٹوں کی جنبش سے بھی پہلے دے دیا مجھ کو

---

جہاں پینے سے پہلے ہی مَیں اپنے ہوش کھو بیٹھوں

دکھا دے ایسا مے خانہ کبھی میرے پیا مجھ کو

---

نشہ ایسا پلا اترے نہ جو روزِ قیامت تک

دوعالم سے ہی بے گانہ تُو کردے ساقیا مجھ کو

---

ترے رخسار کے بوسے لیے ان کی شعاعوں نے

لگی ہے اس لیے اچھی ستاروں کی ضیا مجھ کو

---

دو عالم کے خزانوں سے کہیں بڑھ کر ہے وہ انجؔم

شہنشاہِ عرب نے ہی کیا ہے جو عطا مجھ کو