تاجدار عربیا من موہنیا
سیدا سردارا سب توں سوہنیا
پاسبانا مہربانا سب دیا
سچیا محبوب سچے رب دیا
سوہنیا مازاغ نیناں والیا
سوہنیا والیل زلفاں والیا
والضحٰے والفجر چہرے والیا
سوہنے لولاک سہرے والیا
سب توں اُچیاں شاناں پاون والیا
ہوکے اول آخر آون والیا
بے کساں دے دکھ ونڈاون والیا
ماڑیاں نوں سینے لاون والیا
ڈگے ہوئیاں نوں اٹھاون والیا
سُتے ہوئیاں نوں جگاون والیا
ظلم دے بدل ہٹاون والیا
رحمتاں دا مینہ وساون والیا
دلبرا خواباں چہ آون والیا
سردار عرشاں تے جاون والیا
ہادیا پر نور سینے والیا
سوہنیا سوہنے مدینے والیا
فرش تے ہر تھاں بہاراں تیریاں
عرش تے وی انتظاراں تیریاں
رحمتاں دی نوری چادر تان کے
تو وسایا اجڑیاں نوں آن کے
شاعر کا نام :- محمد علی ظہوری
کتاب کا نام :- کِتھے تیری ثناء