توں ایں میرا مان تے تران سوہنیا
تیرے نال وسدا جہان سوہنیا
آمنہ دی نوری گود وچ آون والیا
سعدیہ دے ڈھاریاں نوں بھاگ لون والیا
اچی تیری ساریاں توں شان سوہنیا
سوہنیا ایہہ سارے تیرے نور دے نظارے نے
تیرے ای کھڈونے شاہا چن تے ستارے نے
ساریاں بہاراں دی توں جان سوہنیا
ذرے ذرے اُتے شاہا تیری حکمرانی ایں
پتے پتے چھیڑی ہوئی تُساں دی کہانی ایں
پُھل پُھل تیرا مدح خوان سوہنیا
ملدے جو تینوں آقا رب نوں اوہ ملدے
بولدا اے رب جدوں لب تیرے ہلدے
تیری ہر گل ہے قرآن سوہنیا
والضحى ، یسین ، طہ تیریاں ای شاناں نے
دتی اے سلامی تینوں ساریاں جہاناں نے
تیرے لامکان تے مکان سوہنیا
صائم جئے غریباں تے وچاریاں دا چارا ایں
آقا توں یتیماں تے غریباں دا سہارا ایں
توں ایں میرا دین تے ایمان سوہنیا
شاعر کا نام :- علامہ صائم چشتی
کتاب کا نام :- کلیات صائم چشتی