یہ دین یہ دانش کا اُجالا تری رحمت

یہ دین یہ دانش کا اُجالا تری رحمت

تُو نے ہمیں ظلمت سے نکالا تری رحمت

---

دُنیا میں شرافت کا وثیقہ ترا احسان

عقبےٰ میں شفاعت کا قبالہ تری رحمت

---

منعم ہے خُدا قاسمِ نعمت ہے ترا لُطف

مُنہ تک جو یہ آتا ہے نوالہ تری رحمت

---

قُرآن کی صُورت میں جو ارسال ہُوا ہَے

اِنساں کی بھلائی کا رسالہ تری رحمت

---

گردوں پہ ظہُورِ مہ و انجم کا سبب تُو

گلشن میں طلُوعِ گُل و لالہ تری رحمت

---

خرمن سے عیاں خوشۂ زرّیں تری برکات

مَعدن میں نہاں لولوئے لالا تری رحمت

---

تُو جامعِ اوصافِ رسولاں بھی ہے لیکن

ہے سب سے بڑا تیرا حوالہ تری رحمت

---

جب پاؤں میں لغزش ہُوئی تیرا ہی بڑھا ہاتھ

مَیں جب بھی گرا تو نے سنبھالا تری رحمت

---

لکھتا ہُوں جو مَیں حرفِ ثنا تری نوازش

پڑھتا ہُوں جو مدحت کا مقالہ تری رحمت

---

اے ذاتِ خطا پوش ترے در پہ کھڑے ہیں

اُمّت کی خطاؤں سے ہے بالا تری رحمت

---

کر دے صفِ اقوام میں پھر ہم کو معزّز

ہے عُقدہ کُشا سیّدِ والا تری رحمت