یہ جو اب التفات ہے اے دل
کوئی تو خاص بات ہے اے دل
مدحِ سرکار ﷺ میں لگے رہنا
اِس میں تیری نجات ہے اے دل
رُخ دکھا دیں تو دن نکل آئے
زلف کھولیں تو رات ہے اے دل
اُن کی یادیں سکون دیتی ہیں
دن ہے اجلا کہ رات ہے اے دل
اُلفتِ مصطفٰے ﷺ سنبھال کے رکھ
’’یہ مری کائنات ہے اے دل‘‘
وہ ملیں تو خُدا بھی ملتا ہے
مُصطفٰے ہی وہ ذات ہے اے دل
ہے یہی تو جلیل کی دولت
مصطفیٰ کی جو نعت ہے اے دل
شاعر کا نام :- حافظ عبدالجلیل
کتاب کا نام :- مشکِ مدحت