پل صراطوں سے گزر ، جسم نہ رکھ

پل صراطوں سے گزر ، جسم نہ رکھ ، دل ہو جا

زندگی سرحدِ توحید میں داخل ہو جا

---

شوق تعظیم سراغ اس کا لگانا ہے اگر

راستے کاٹ کے آوارہء منزل ہو جا

---

صرف اپنے خد و خال میں مصروف نہ رہ

پس آئینہ کی آواز میں شامل ہو جا

---

پاؤں اٹھے گا ترا، آئے گی آہٹ اس کی

بے نشانی کا سفر کرنے کے قابل ہو جا

---

اپنی منائیاں بھی دل کے حوالے کردے

سانس تقسیم نہ کر ، عمر کا حاصل ہو جا

---

کس نے پہچانا ہے اللہ کے سوا اللہ کو

بے پناہیء طلب کا متحمل ہو جا

---

ریت پر بیٹھ کر نظارہ گرداب نہ کر

جہاں گہرائی اترتی ہے وہ ساحل ہو جا

---

کرسی و عرش بھی پلکوں پہ اٹھا سکتا ہے

خوف و امید کے مابین کا حامل ہو جا

---

مار سکتا نہیں پھر کوئی مظفر تجھ کو

اپنے احساس مسیحائی کا قاتل ہو جا