اُٹھا ہے بارگاہِ حق میں یہ دستِ دُعا میرا

اُٹھا ہے بارگاہِ حق میں یہ دستِ دُعا میرا

خدا کے ذکر سے روشن رہے دل کا دیا میرا

---

جو فرمانِ خدا ہے بس وہی ہے مدعا میرا

رسولِ پاکﷺ کا اسوہ ہے ہر دم رہنما میرا

---

میرے بگڑے ہوئے سب کام سیدھے ہوتے جاتے ہیں

ہر اِک مشکل میں ربِّ دوجہاں ہے آسرا میرا

---

ہیں سورج چاند بھی تابع، نکالے رات سے دن کو

بنایا چھے دنوں میں جس نے عالم وہ خدا میرا

---

جہاں حمد و ثنا کے پھول کھلتے ہیں وہ منزل ہے

دمِ آخر خدایا ہو یہی اک راستہ میرا

---

خدا نے آپ کی امّت میں شامل کرلیا مجھ کو

رسولِ پاک کی نسبت سے روشن گھر ہوا میرا

---

جہاں حمد و ثنا کے گونجتے ہیں زمزمے طاہرؔ

خدا کا شکر قائم ہے وہاں سے رابطہ میرا