جب سراپا نور کی جلوہ نمائی ہو گئی

جب سراپا نور کی جلوہ نمائی ہو گئی

ضو فشاں وحدانیت روشن اکائی ہو گئی

---

حشر میں جس وقت چشمِ مصطفائی ہو گئی

پھر سمجھ لو قیدِ دوزخ سے رہائی ہو گئی

---

میں تلاوت کر رہا تھا آیتیں قرآن کی

اور نبیِٔ پاک کی مدحت سرائی ہو گئی

---

مشکلوں میں جب اغثنی یا نبی میں نے کہا

دیکھتے ہی دیکھتے مشکل کشائی ہو گئی

---

قبر کی ظلمت مٹی ہر سو اجالا ہوگیا

جس گھڑی سرکار کی جلوہ نمائی ہو گئی

---

سب بھٹکتے پھر رہے تھے گمرہی میں چارسو

آگئے آقا مِرے تو رہنمائی ہو گئی

---

تھا شفیق ؔ آقائے نعمت کا وسیلہ اس لیے

ہاتھ اُٹّھے بھی نہ تھے حاجت روائی ہو گئی