اے شمع رسالت ترے پروانے ہزاروں ہیں

اے شمع رسالت ترے پروانے ہزاروں ہیں

اک میں ہی نہیں تیرے تو دیوانے ہزاروں ہیں

---

اعجاز ہے یہ ساقی کوثر کی نگاہوں کا

میخوار ہزاروں ہیں مے خانے ہزاروں ہیں

---

ہو جن میں سدا آنا جانا مرے آقا کا

اس دنیا میں ایسے بھی کاشانے ہزاروں ہیں

---

اس عالم ہستی میں کس کس کا گلہ کیجئے

اپنے بھی ہزاروں ہیں بیگانے ہزاروں ہیں

---

میخانہ طیبہ کے مے خواروں سے نسبت ہے

مرے لئے پینے کو مے خانے ہزاروں ہیں

---

مجذوب ہوں مجنوں ہوں دیوانہ ہوں پاگل ہوں

دو چار نہیں مرے تو افسانے ہزاروں ہیں

---

جو نام محمد پر ہر چیز لٹاتے ہیں

ایسے بھی تو دنیا میں دیوانے ہزاروں ہیں

---

دل چیز ہے کیا جاناں اک تیرے اشارے پر

دینے کے لئے جان کے نذرانے ہزاروں ہیں

---

یہ سن کے ہم آئے ہیں نظروں سے پلاتے ہو

ورنہ تو مرے شہر میں مے خانے ہزاروں ہیں

---

جو مست رہیں ہر دم عشق شہ بطحا میں

اے یار نیازی وہ مستانے ہزاروں ہیں