اپنی وسعت دیکھ کر ، اپنی رعایت دیکھ کر

اپنی وسعت دیکھ کر ، اپنی رعایت دیکھ کر

ہنس پڑی رحمت مرے دامن کی حالت دیکھ کر

---

آپؐ سے صرف آپ کو چاہا، نہ چاہا اور کچھ

مانگتا ہے ہر کوئی اپنی ضرورت دیکھ کر

---

زندگی ہے وقف ِ توصیفِ پیمبرؐ آج بھی

آج بھی زندہ ہوں میں دل کو سلامت دیکھ کر

---

اصل میں اُنؐ کی حقیقت کو نہ میں سمجھا نہ تُو

تبصرے کرنے لگے بس اُنؐ کی صورت دیکھ کر

---

ہر قدم پر چاہیے لَا تَر فَعُوا پیش نظر

بات کر اُنؐ کا مقام اور اُنؐ کی عظمت دیکھ کر

---

نعت ہے اعظؔم اسے بھی ترک کر سکتا نہیں

اور گھبراتا بھی ہوں اپنی بضاعت دیکھ کر