عصمتِ حسنِ پیمبرؐ سے ضیا ڈھونڈیں گے
’’آپؐ کی سیرتِ اطہر سے ضیا ڈھونڈیں گے‘‘
زندگانی کو قرینے سے نبھانے کے لیے
سنتِ والیِ کوثر سے ضیا ڈھونڈیں گے
دوستی، زندہ دلی، حسنِ مروّت کے طفیل
ہم سیہ بخت ترے در سے ضیا ڈھونڈیں گے
ڈھونڈنا ہے جو ہمیں حسنِ کمالِ انساں
جملہ اوصاف کے پیکر سے ضیا ڈھونڈیں گے
انؐ کے میثاقِ مدینہ کی فراست پہ فدا
لوگ پیغمبرِؐ داور سے ضیا ڈھونڈیں گے
آپؐ کی چارہ گری، بندہ نوازی سب سے
ہم بھی اخلاقِ پیمبرؐ سے ضیا ڈھونڈیں گے
ذرّے مہتاب ہیں طیبہ کی زمیں کے طاہرؐ
ہم اسی راہِ منوّر سے ضیا ڈھونڈیں گے
شاعر کا نام :- پروفیسر محمد طاہر صدیقی
کتاب کا نام :- طرحِ نعت