دل کشا، دل ربا دل کشی ہو گئی

دل کشا، دل ربا دل کشی ہو گئی

’’آپ آئے تو پھر روشنی ہو گئی‘‘

---

نقشِ پا جس جگہ خاک پر پڑ گئے

اس جگہ سے مری دوستی ہو گئی

---

دہر میں جس کسی نے انہیں پا لیا

معتبر اس کی پھر زندگی ہو گئی

---

مصطفیٰ کی نظر جس بشر پر پڑی

اُس کی طیبہ میں پھر حاضری ہو گئی

---

پھر کسی اور جانب گئی کب نظر

مصطفیٰ کی جسے آگہی ہو گئی

---

دین کامل ہوا آپ کے نور سے

جو رسالت ملی آخری ہو گئی

---

چرخِ درویش یوں روشنی دے گیا

ہر گلی میں علی حق علی ہو گئی

---

عاشقی کی نظر سے نبی مل گئے

زندگی چاشنی چاشنی ہو گئی

---

انگلیوں سے بہا فیضِ آبِ رواں

دور اصحاب کی تشنگی ہو گئی

---

دل دھڑکنے لگا نعت ہونے لگی

مجھ پہ ان کی نظر مدھ بھری ہو گئی

---

قائمِ بے نوا، بے نوا ہے کہاں

جب زباں سے بیاں ذاکری ہو گئی