دل میں کیا رکھّا ہے اب الفتِ حضرت کے سوا
اُڑ گئے رنگ سبِھی رنگِ حقیقت کے سوا
حق کو دیکھا ہے خدائی نے جس آئینے میں
کوئی لائے گا کہاں سے تری صُورت کے سوا
آستانِ شہِ لولاک سے آگے جا کر
کچھ نہ پایا دلِ مُشتاق نے حیرت کے سوا
نُورِ توحید سے بھٹکے ہُوئے پروانوں کو
کوئی رہبر نہ ملا شمِع رسالت کے سوا
تو سما جائے اِن آنکھوں میں تو آنکھوں کی قَسَم
کوئی صُورت بھی نہ دیکھوں تری صُورت کے سوا
ہیچ ہے دولتِ کُونین نگاہوں میں مری
کوئی مقصُود نہیں تیری محبّت کے سوا
اعظؔم اُس بار گہِ شاہ میں کیا لے کے چلُوں
میرے دامن میں ہے کیا اشکِ ندامت کے سوا
شاعر کا نام :- محمد اعظم چشتی
کتاب کا نام :- کلیاتِ اعظم چشتی