عشق تیرا نہ اگر میرا مسیحا ہوتا

عشق تیرا نہ اگر میرا مسیحا ہوتا

میں بھی پندار کے صحراؤں میں کھویا ہوتا

---

تیری نسبت نے سنوارا مرا اندازِ حیات

میں اگر تیرا نہ ہوتا ، سگِ دُنیا ہوتا

---

ہائے وہ دل جو نہیں تیری محبت کا امیں

اچھا ہوتا جو ترا نقشِ کفِ پا ہوتا

---

یہ مری اپنی طلب تھی مجھے تُو مل جائے

ورنہ اللہ بھی مل جاتا جو مانگا ہوتا

---

جس کی تنویر بنی غارِ حرا کی زینت

کاش وہ نُور مرے دل کا اُجالا ہوتا

---

آنکھ کو دل نہ ملا ، دل کو نگاہیں نہ ملیں

ورنہ اس چاند کو گھر میں نہ اتارا ہوتا

---

یاد سے جس کی مہکنے لگے صحرائے خیال

پھول وہ دل میں سجا ہوتا تو کیسا ہوتا

---

کُوئے سرکار میں ہوگا کہیں مصروفِ طواف

دل اگر سینے میں ہوتا تو دھڑکتا ہوتا

---

کاش یہ آنکھ تری راہ کے تنکے چُنتی

دل ترے شہر کی گلیوں میں سُلگتا ہوتا

---

میں تیرے نام کی دیتا رہا دنیا میں صدا

پھرمجھے کیوں غمِ دنیا ، غم عقبیٰ ہوتا

---

کوئی حسرت بھی تو ہو ، کوئی تمنا بھی تو ہو

کیوں عطا حوصلۂ عرضِ تمنا ہوتا

---

”حدِّ کُنہ تو بادارک نشاید دانست“

دل کی آنکھوں سے کوئی دیکھنے والا ہوتا

---

مجھ کو مرغوب نہیں شہد کی نہریں ساقی

میرے پینے کو کوئی آگ کا دریا ہوتا

---

خاک ہوتا تو ہواؤں سے لپٹ کر اعظؔم

آستانِ شہہ لولاک ؐ پہ پہنچا ہوتا