چلے ہیں اہلِ طلب سُوئے منزلِ مقصُود

چلے ہیں اہلِ طلب سُوئے منزلِ مقصُود

دِلوں میں عشق لبوں پر ترانہ ہائے درُود

---

جمی ہُوئی ہے نظر اُن کے سبز گنبد پر

اُتر رہی ہیں دل و جاں میں کیفیاتِ شہُود

---

درِ کرم پہ کھڑے ہیں بہ چشمِ تر آقا

نظر جُھکی ہُوئی، پیشانیاں عرق آلود

---

خوشا نصیبِ کسی کو بدامنِ تو رسید

بہ دامنِ تو رسید و بہ دوجہاں آسود

---

بس اِک نشاطِ حضُوری کہ جس میں بُعد نہ ہجر

بس اِک زمانِ مسلسل کہ جِس میں رفت نہ بود

---

ابد کے نرخِ گراں پر بھی مَیں عطا نہ کروں

تڑپ تڑپ کے مِلا ہے یہ لمحۂ موجود

---

یہ ساری رونقِ ہستی اِنہی سے ہے ورنہ

سوائے خلوتِ لاہوت کُچھ نہ تھا موجُود

---

احاطہ اُن کے جلال و جمال کا کیا ہو

کہ ہیں وسائلِ عشق و خرد بہت محدود

---

چراغِ ماہ میں وہ، شمعِ آفتاب اُن سے

ستارہ ہائے فلک سے زیادہ اُن پہ درُود

---

اگر اطاعتِ سرکارؐ پر نہ ہو بُنیاد

مثالِ خانۂ برباد ہیں رکُوع و سجُود

---

اُنہی کے در پہ کجاوے کھُلیں گے آخرکار

رُکے گا ایک ہی منزل پہ کاروانِ وجُود

---

بجز گزارشِ دیدار کیا کروں عاصیؔ

کہ ایک بندۂ مجبُور کی یہی ہیں حدُود