جاری اے فیض زمانے تے سرکار مدینے والے دا
ہر ویلے کھلا رہندا اے دربار مدینے والے دا
جس دِید خُدا دی کرنی ایں اوہ ویکھے مدنی ماہی نوں
دیدار ہے رب عالم دا دیدار مدینے والے دا
صدیق، عمر، عثمان، علی بوذر ، یاسر ، سلمان، طلحہ
اعلیٰ توں اعلیٰ ہر اک اے شہکار مدینے والے دا
اُس دِل وچ نُور ہے آجاندا اُس دِل وِچ طور سما جاندا
جس دل دے اندر ہندا اے بس پیار مدینے والے دا
اوہ جدھر نظر اُٹھاندا اے مستی ورتائی جاندا اے
نہیں رکھدا طلب صُراحیاں دی میخوار مدینے والے دا
بس ایہو ای نکتہ دسیا اے سب ولیاں غوثاں قطباں نے
جے یار خدا دا بنناں ایں بن یار مدینے والے دا
ہن مکیاں ساریاں غرضاں نے بس ایہو ای صائم عرضاں نے
فر مُڑ کے روضہ دیکھ لواں اک وار مدینے والے دا
شاعر کا نام :- علامہ صائم چشتی
کتاب کا نام :- کلیات صائم چشتی