جتّھوں تک کبریائی کبریا دی
اوتھوں تک مُصطفائی مصطفےٰؐ دی
جہدے اُتے کرم مُشکل کشا دا
اوہدے اُتے نظر خیر الورا دی
غلامی دے سِوا کُجھ وی نہ منگیں
بڑی شان اے محمدؐ دے گدا دی
مَیں کیہہ جانا مِرا معبُود کون اے
کراں پُوجا مُحمدؐ دے خدا دی
او جِس دا حال پُچھن آپ آکے
کیہہ اُس بیمار نوں حاجت شفا دی
رسُولؐ اللہ دی رحمت دے ہُندیاں
ضرورت کیہہ کِسے حاجت روا دی
نہ بھُلاں مَیں کدی حفظِ مراتب
مرے اُتے نظر احمدؒ رضا دی
جے ہُندا اعظؔم اج دُنیا تے جامؔیؒ
مَیں چمدا خاک اوہدے نقشِ پا دی
شاعر کا نام :- محمد اعظم چشتی
کتاب کا نام :- کلیاتِ اعظم چشتی