کھلا اے در میخانے دا رحمت دیاں لگیاں جھڑیاں نے
کئی پی پی ایتھوں ٹر گئیاں کئی وچہ اڈیکاں کھڑیاں نے
تینوں واعظ قصے جنت دے ساڈی جنت یار دے قدماں وچہ
توں ہور کتاباں پڑھیاں نے اسیں ہور کتاباں پڑھیاں نے
تک تک کے چہرہ مرشد دا اج ریجھاں لاہ لئو خوش بختو
مڑ آون آون نہ آون ایہہ کرماں والیاں گھڑیاں نے
عقلاں دیاں سوچاں کچیاں نے گلاں عاشقاں کیتیاں سچیاں نے
جے نچتاں پیا تے نچیاں نے جو عشق دے ویڑے وڑیاں نے
جے یار دی لوڑ تے لوڑ ہووے گل ہور دی ہور دی ہور ہو وے
جہدی مرشد دے ہتھ ڈور ہو وے او ہو گڈیاں اچیاں چڑھیاں نے
ٹھنڈ پئے جائے میرے سینے نوں جاواں مڑ کے شہر مدینے نوں
چماں جا کے عرش دے زینے نوں میرے دل وچہ آساں بڑیاں نے
کوئی ہور نگاہواں وچہ میری جچیا نئیں ہن تک رب جانے
جس دن توں نیازی ایہہ اکھیاں اس سوہنے دے نال لڑیاں نے
شاعر کا نام :- عبدالستار نیازی
کتاب کا نام :- کلیات نیازی