خورشید سےکچھ کم نہیں وہ چشمِ بشر میں

خورشید سےکچھ کم نہیں وہ چشمِ بشر میں

ذرّے جو نظر آئے مدینے کے سفر میں

---

اللہ رے اشکِ غمِ احمدؐ کی یہ جھِلمل

مہتاب جھلکتے ہیں مِرے دیدۂ تر میں

---

کیا مجھ کو لُبھا سکتے ہیں گردُوں کے ستارے

ہر ذرّہ مدینے کی زمیں کا ہے نظر میں

---

بخشی ہے جو قدرت نے مِرے اشِک وفا کو

وہ آب کہاں ہے کسی تابندہ گُہَر میں

---

یہ بات، یہ انداز کہاں اُن کو میّسر

کب ہے دلِ مضطر کی ادا برق و شرر میں

---

جو شَے ہے تصدّق ہے وہ محبوبِؐ خدا پر

کونین ہیں سرکارِؐ دو عالَم کے اثر میں

---

سُنسان ہے، ویران ہے دُوری سے مِرا دل

جلووں سے چراغاں ہو کسی دن مِرے گھر میں

---

آنکھوں میں سمائے ہیں مدینے کے مناظر

آجائیں گے ہم بھی شہِؐ بطحا کی نظر میں

---

دیوانہ و بیتاب ہُوں ایسا کہ نصیرؔ اب

ہر وقت مدینے کا ہے سودا مِرے سَر میں