کون و مکاں میں یا نبی تجھ سا نہیں کوئی

کون و مکاں میں یا نبی تجھ سا نہیں کوئی

حق ہے کہ حق نے تجھ سا بنایا نہیں کوئی

---

تیرے کرم سے تیرے گدا بھی ہیں بے مثال

تجھ سا بھی کائنات میں داتا نہیں کوئی

---

خیرات تیرے حسن کی ہے حسن کائنات

تجھ سا حسین دہر میں آیا نہیں کوئی

---

سب انبیاء کو حق نے دیئے مرتبے بلند

لیکن میرے حضور سے بالا نہیں کوئی

---

بھرتے ہیں سب کی جھولیاں سلطان دو جہاں

ان سا سخی زمانے میں دیکھا نہیں کوئی

---

آتا ہے جو بھی پاتا ہے منہ مانگی وہ مراد

اس آستاں پہ اپنا پرایا نہیں کوئی

---

بے اذن جبرائیل بھی داخل نہ ہو سکیں

جیسا ہے گھر حضور کا ایسا نہیں کوئی

---

وقت اجل ہو سامنے چہرہ حضور کا

اس کے سوا بس اور تمنا نہیں کوئی

---

شامل ہے جو نیازی نبی کے گداؤں میں

اس جیسا خوش نصیب بھی ہو گا نہیں کوئی