مَیں پچھلے سال اِن دنوں شھرِ نبیؑ میں تھا

مَیں پچھلے سال اِن دنوں شھرِ نبیؑ میں تھا

قدموں میں تھا حضُور میں تھا حاضری میں تھا

---

خوباں کے کوچہ ہائے ملامت سے دُور تو

محبُوبِؐ کبریا کی مقدّس گلی میں تھا

---

از جسم تا بہ جانم و از چہرہ تابہ دل

دن رات اِک برستی ہُوئی روشنی میں تھا

---

چھُوتی تھی اُن کے گنبدِ خضرا کو چاندنی

اور مَیں براہِ راست اُسی چاندنی میں تھا

---

ساری بہار سِمٹی ہُوئی تھی نگاہ میں

سارا چمن بھرا ہُوا دِل کی کلی میں تھا

---

میری جبیں تھی فرشِ مصلّےٰ پہ سجدہ ریز

اللہ یہ شرف بھی مِری زندگی میں تھا

---

ہوتا نہ کیُوں میں داخلِ جنّہ کہ جیتے جی

باغِ بہشت دسترسِ آدمی میں تھا

---

اللہ رے اُن کے لُطف کی مہماں نوازیاں

مصروف ہر گھڑی مِری دل بستگی میں تھا

---

پیتی تھی رُوح بادۂ عشقِ نبیؐ کے جام

اِک سانس سرخوشی میں تھا اِک بے خودی میں تھا

---

یکسر وہاں بدل گئی ماہیّتِ الم

آنسو جو سطحِ چشم پہ آیا، خُوشی میں تھا

---

اللہ بھی قریب تھا، سرکارؐ بھی قریب

لذّت سجُود میں تھی، مزا بندگی میں تھا

---

اب تُم کو کیا بتاؤں، مَیں کِس کیفیت میں ہُوں

مَیں پچھلے سال اِن دنوں شھرِ نبیؐ میں تھا