مرنا نہیں آتا اسے جینا نہیں آتا

مرنا نہیں آتا اسے جینا نہیں آتا

جس شخص کے سینے میں مدینہ نہیں آتا

---

اللہ کی رحمت بھی نہیں جوش پہ آتی

جب تک کہ ندامت کا پسینہ نہیں آتا

---

لگتا ہے کچھ ایسے تیری چاہت میں کمی ہے

لب پر ترے گر ذکر مدینہ نہیں آتا

---

گر مجھ کو پلانا ہے پلا اپنی نظر سے

ساقی مجھے پیمانے سے پینا نہیں آتا

---

عشق شہ کونین کی دولت ہے نرالی

ہر شخص کے ہاتھوں یہ خزینہ نہیں آتا

---

محبوب خدا کے جو حوالے نہ کیا جائے

ہرگز وہ کنارے پہ سفینہ نہیں آتا

---

کیا مانگوں حضور آپ سے کس طرح میں مانگوں

اظہار تمنا کا قرینہ نہیں آتا

---

محبوب خدا کا جو ہو دیوانہ نیازی

اُس شخص کے دل میں کبھی کینہ نہیں آتا