نہ اوہ پہلوں خدا ہیسی نہ آیا اے خدا بن کے
خدا دا نور آیا اے محمد مصطفیٰ ﷺ بن کے
بشر تے کیہ خبر اوہدی فرشتے وی نہیں پا سکدے
جو آیا آمنہ دے گھر امام الانبیاء بن کے
ہنیرے نوں مٹا دتا زمانے چوں محمد ﷺ نے
کدی شمس الضحیٰ بن کے کدی بدر الدجی بن کے
خدا دیاں رحمتاں دی ہر طرف برسات ہو جاندی
جدوں لہراؤندیاں نے اُسدیاں زُلفاں گھٹا بن کے
پتہ لگناں ایں اُسدیاں عظمتاں دا دن قیامت دے
اوہدے در تے جدوں آئے سوالی انبیاء بن کے
علی ہووے ، ولی ہووے تے بھانویں کوئی ہے صائم
جہنے پایا ہے جو پایا اوہدے در دا گدا بن کے
شاعر کا نام :- علامہ صائم چشتی
کتاب کا نام :- کلیات صائم چشتی