نظر نظر نوں قرار دیندا دلاں نوں کردا اسیر آیا
چمک پیا اے جہان سارا خُدا دا مہر منیر آیا
اوہ سوہنا آیا جواب جس دا ، نئیں کول رب دے وی ہور کوئی
جو سارے نبیاں توں پہلاں بنیاں ، اوہ سب توں سوہنا اخیر آیا
ہے قبضے اوہدے چ سب خُدائی، جہان کردا اہدی گدائی
ہے اوہ وی لوکاں نوں دیندا جنت ، جو بن کے اوہدا فقیر آیا
حلیمہ گلی تیری توں صدقے ، محل شاہی تے کوٹھیاں نے
اوہ دیکھ اجڑ چران تیرے ، نبی بشیر نذیر آیا
وسا کے اکھاں دے وچ مدینہ ، دلاں دے دامن وچھاندے جاؤ
ہے قبضہ کوثر تے جہدا ایتھے ، اوہ ونڈدا خیر کثیر آیا
گیا ساں نعتاں سناؤندا سن دا ، میں قبر اندر جہان وچوں
حضور آگئے چُھڑان پہلوں ، جدوں سی منکر نکیر آیا
ربیع الاول دی باراں اُتوں ، ہاں صدقے سارے دناں نوں کردا
میں پیر دے دن توں جاواں صدقے ، جہدے چ نبیاں دا پیر آیا
مکین ولے مکان ولے ، ہے بلکہ سارے جہان ولے
مرے محمد دا نُور صائم ، ہنیرے دُنیا دے چیر آیا
شاعر کا نام :- علامہ صائم چشتی
کتاب کا نام :- کلیات صائم چشتی