اوہ ریجھ کدی نہ سکدے نے جنت دیاں لالہ زاراں تے
اکوار نظر پے جاندی اے جنہاندی عرب دیاں خاراں تے
اوہ حُسن نئیں عرش معلی تے اوہ کیف نئیں اسماناں تے
جو رُوپ نورانی چڑھیا اے طیبہ دے پاک بازاراں تے
حبشی ول تک کے سوہنے نے چن نالوں سوہنا کر چھڈیا
پُھل بن گئے پائی نظر جدوں محبوب مرے نے خاراں تے
اوہ ودھ شیشے توں چمکدیاں ودھ چن دے نالوں دمکدیاں
لشکاں اُسدے رُخسار دیاں پے جان جنہاں دیواراں تے
اوہ کول سُلائے ہوئے نے وچ گود لٹائے ہوئے نے
تنقید نہ کر پیا بے دردا کملی والے دے یاراں تے
کی طاقت ہیسی کُوفیاں دی تلوار چلاوندے ایہناں تے
خُود دین بچان لئی آلِ نبی سر رکھ دتے تلواراں تے
جد عملاں والے محشر وچ پئے پرچے دیندے ہوون گے
رحمت نے پردے پا دینے صائم جے اوہ گنہاراں تے
شاعر کا نام :- علامہ صائم چشتی
کتاب کا نام :- کلیات صائم چشتی