راہی طیبہ دے تیرے توں قربان میں
ویکھ جا کے محمد دے دربار نوں
روندے ہویاں نوں در تے بلا سوہنیا
جا کے آکھیں مدینے دے سردار نوں
تیرا تارا بلندی تے ہے زائرا
جاویں راہواں چ ہنجواں دے پھل وار دا
حال ساڈا توں جو جو ہیں ویہندا ربیا
جاکے دس دیویں رو رو کے سرکار نُوں
تیرے روون دا مل پے گیا دوستا
تینوں سوہنے دا پیغام ہے آگیا
پُھل اوتھے عقیدت دے رہیں واردا
بوسے پلکاں دے دینے ای ہر خارنوں
جا کے واریں توں ہنجواں دیاں ڈالیاں
نالے چمدا ادب تھیں رہویں جالیاں
ویکھیں گنبد دیاں جد توں ہریالیاں
یاد کر لئیں ذرا اس گنہگار نوں
پورا ہو جائے جس دم تیرا مدعا
میرے حق وچ وی رو رو کے کر دیں دعا
ڈھیر مدتاں ہوئیاں ہن تے در تے بلا
آکھ دیویں زمانے دے غمخوار نُوں
آکھیں زہرا دے حُجرے تے گردن جھکا
تینوں شبر تے شبیر دا واسطہ
اپنے بابا نوں اک وار آکھو ذرا
فیر سد لین صائم خطا کار نُوں
شاعر کا نام :- علامہ صائم چشتی
کتاب کا نام :- کلیات صائم چشتی