رنگ بہاراں تھاں تھاں سُٹّے
مان تران خزاں دے ٹُٹّے
بدّل خُوشیاں والے وَسّے
غم دے جنگل بیلے ہَسّے
کھِڑیاں صِدق صفا دیاں کلیاں
مہکیاں دِل دیاں سُنجیاں گلیاں
نُور خُدا دے پائی جھاتی
چانن دے وِچ دُنیا نہاتی
پُھٹیا سچیائی دا سُورج
جھم جھم کہ دا سجرا سُورج
شُکر خُدا دا کسے وسیلے
سدھراں دے ہَتھ ہوئے پیلے
ربّ سچّے نےکرم کمایا
پاک مُحمّدؐ جگ وِچ آیا
آیا بن کے ربّ دی رحمت
جاگی اِنساناں دی قسمت
مجبُوراں دِیاں سُنیاں گیّاں
مہجوراں دیاں سُنیاں گیّاں
خوُش خبری مسکیناں تائیں
آیا سبھ دے سر دا سائیں
دردی سارے دُکھیاراں دا
ربّ دا بندہ جگ دا مولا
بچپن توں سچ بولن والا
دِل دیان گنڈھاں کھولن والا
پتّھر کھا کے دوے دُعا واں
اُسدے خُلق توں صَد قے جاواں
پڑھدا اُس تے لُوں لُوں دَم دَم
صَلَّی اللہُ عَلَیْہِ وَسَلّم
شاعر کا نام :- حفیظ تائب
کتاب کا نام :- کلیاتِ حفیظ تائب