اس سے ظاہر ہے مقام و مرتبہ سرکار کا

اس سے ظاہر ہے مقام و مرتبہ سرکار کا

ہے سرِ عرشِ معلیٰ نقشِ پا سرکار کا

---

جس نے دیکھا اک نظر وہ ہو گیا سرکار کا

دیکھنے والوں نے دیکھا معجزہ سرکار کا

---

کام کرتا ہے یہاں بھی، بھیج کردیکھو درود

ہے مدینے میں بھلے دارالشفا سرکار کا

---

حشر کے میدان میں اپنی شفاعت کے لئے

آسرا ہے تو ہمیں بس آسرا سرکار کا

---

زلف عنبر بو ہے ان کی آیتِ والیل میں

والضحیٰ میں چہرئہ شمس الضحیٰ سرکار کا

---

کس طرف سے وہ ابھی گزرے ہیں، اصحابِ نبی

کر لیا کرتے تھے خوشبو سے پتہ سرکار کا

---

باوضو ہوکر درودِ پاک پڑھتی ہے ردیف

نعت میں لاتا ہوں میں جب قافیہ سرکار کا

---

رات دن پڑھتے رہیں گر اپنے آقا پر درود

ہم نہ کر پائیں گے پھر بھی حق ادا سرکار کا

---

عشقِ سرکارِ دو عالم کا تقاضہ ہے شفیقؔ

ہو ہمیشہ ہی زباں پر تذکرہ سرکار کا