رسول کوئی کہاں شاہِؐ انبیا کی طرح

رسول کوئی کہاں شاہِؐ انبیا کی طرح

مُطاعِ خَلق ہیں قرآں میں وہ خدا کی طرح

---

‘‘پڑی ہے دل میں مِرے عشقِ مصطفیٰؐ کی ’’طرح

مہک رہا ہے مِرا ہر نَفَس صبا کی طرح

---

نہ تھا نہ ہے کوئی اُن سا نہ ہوسکے گا کبھی

وہ اپنی ذات میں بے مِثل ہیں خدا کی طرح

---

کوئی کتاب کب اُمُّ الکتاب کی صُورت

کوئی نبیؑ نہ ہُوا سیّد الوریٰ کی طرح

---

مِرے غموں کا مداوا فقط حُضوری ہے

بہر نَفَس ہے یہ دُوری مجھے سزا کی طرح

---

کوئی بشر نہ تری گردِ راہ کو پہنچا

تمام عُمر بھٹکتا رہا ہَوا کی طرح

---

تِری نگاہ میں تھی عفو و درگزر کی جھلک

عَدُو سے آنکھ مِلائی تو آشنا کی طرح

---

جگہ اگر تِرے قدموں میں مجھ کو مِل جاتی

تو چُومتا تِرے نعلین، نقشِ پا کی طرح

---

نبیؐ کے روضے کی ہر صبح جالیاں چُوموں

اگر ملے تو مقّدر ملے صبا کی طرح

---

چمک اُٹھا تِرے جلووں سے دل کا آئینہ

خیالِ غیر مٹا نقشِ ماسِوا کی طرح

---

حُضُورؐ! دُخترِ تہذیبِ نَو پہ، ایک نظر

یہ سَر برہنہ ہے، بانُوئے بے رِدا کی طرح

---

نصیرؔ کو بھی اجازت ملے خدا کے لیے

پڑا رہے تِری دہلیز پر گدا کی طرح