روندے نین بتھیرے روندے نین بتھیرے
تیرے ہجر چہ سجناں ہنجو رُکدے نہیں میرے
تیرے درد ہجر نے مینوں مار مکایا
تینوں حالی وی ڈھولا کوئی ترس نہ آیا
دکھ کس نوں سناواں ویری چار چوفیرے
روندے نین بتھیرے روندے نین بتھیرے
تیری تاہنگ وچ ماہی بوہے اکھیاں دے کھولے
میرے من دا پپیہا پیا، پیا پیا بولے
سائیاں کرم کما جا لڑ لگیاں میں تیرے
روندے نین بتھیرے روندے نین بتھیرے
تارے رو رو کے سوں گئے ہوئیاں کالیاں راتاں
راتاں لنگھ گئیاں اینویں کدی ہوئیاں وی نہ باتاں
توں نہ آیوں وے ڈھولا کدی سانجھ سویرے
روندے نین بتھیرے روندے نین بتھیرے
رو رو کملیاں وانگوں دیواں تیریاں دُہائیاں
اجے تیک میرے سائیاں تساں پھیریاں نہ پائیاں
کدی بولیا نہ بھل کے کاگ میرے بنیرے
روندے نین بتھیرے روندے نین تھیرے
یاداں تیریاں نیازی میں تے سانبھ سانبھ رکھاں
ایہو کیتیاں دُعاواں میری کلی دیاں لکھاں
رہن وسدے ہمیشہ تیرے محل اچیرے
روندے نین بتھیرے روندے تین بتھیرے
شاعر کا نام :- عبدالستار نیازی
کتاب کا نام :- کلیات نیازی