سوہنے نبی لج پال کریماں تیریاں دھماں چار چوفیرے
جبرائیل جئے تیرے چاکر دو جگ آقا منگتے تیرے
دو جگ دا سلطان وی توں ایں میرا مان تران وی توں ایں
تیرے جیہا مینوں ہور نہ کوئی میں ورگے تینوں ہور بتھیرے
عرش تے جاون والیا آجا عرض کراں ایہ رات دنے
میرے دل دی جھوک وسا جا وسدے رہن سخی دے ڈیرے
مل کے بہہ جانی آں راہواں پچھاں اوندیاں جاندیاں توں
اون گیاں کدی تیریاں خبراں بولے گا کدی کاگ بنیرے
میرا کوئی وس نہ چلے کر کر ہلے غم آون
تیری یاد دے پھڑ کے پلے یاد کراں تینوں شام سویرے
تیرے در تے کیویں آواں دور وسنیدیا محبوبا
جے کر تیریاں ہون عطاواں آن لواں روضے دے پھیرے
جے کر مینوں کول بلاویں مک جاون سب روگ شہا
تینوں بخشیاں رب توفیقاں لیکھ جگا دے سوہنیاں میرے
میں کی ہاں کی میری حقیقت تیریاں کرم نوازیاں نیں
مینوں سکھ دا ساہ نہ آوے جیکر کرم نہ ہوون تیرے
جے سوہنے دی نظر ہو جاوے میں ککھ وی ہاں لکھ ورگا
اک کوڈی وی مل نئیں میرا جے اوہ سوہنا نظراں پھیرے
کنیاں کرم نوازیاں ہویاں تیرے ایس نیازی تے
میرے کولوں گن نئیں ہندے جو احسان میرے تے تیرے
شاعر کا نام :- عبدالستار نیازی
کتاب کا نام :- کلیات نیازی