سوتے میں نعتِ پاک ہوئی ہے کبھی کبھی

سوتے میں نعتِ پاک ہوئی ہے کبھی کبھی

صد شکر یوں بھی آنکھ لگی ہے کبھی کبھی

---

جیسے ریاض جنّہ میں اب بھی کھڑا ہوں میں

بزم خیال یوں بھی سجی ہے کبھی کبھی

---

جیسے اذاں یہاں کی نہیں ہے وہاں کی ہے

طیبہ کی ہر اذاں یوں لگی ہے کبھی کبھی

---

جیسے یہاں نہیں ہوں میں صحنِ حرم میں ہوں

جیسے وہیں نماز پڑھی ہے کبھی کبھی

---

جیسے کوئی مدینے سے خط آیا میرے نام

دستک سی دل پہ یوں بھی ہوئی ہے کبھی کبھی

---

جیسے وہاں بھی نعت سنائی گئی مِری

صل علیٰ کی گونج سنی ہے کبھی کبھی

---

جیسے میرا بلاوا مدینے سے آگیا

دھڑکن سی دل میں یوں بھی ہوئی ہے کبھی کبھی

---

طیبہ کے پھول جیسے مِرے گھر میں کھل گئے

ایسی ہوا بھی ایک چلی ہے کبھی کبھی

---

خوشبو سے یک بیک مِرا کمرہ مہک گیا

اقبؔال یوں بھی آنکھ کھلی ہے کبھی کبھی