طیبہ میں ہیں فلک کے حوالے زمین پر
ذرے بکھیرتے ہیں اجالے زمین پر
امداد کیجئے کہ پریشان ہیں بہت
آقا تمہارے چاہنے والے زمین پر
زیرِ زمیں عمل کا نہیں ہوگا سلسلہ
سجدے میں اپنے سر کو جھکالے زمین پر
شمس و قمرحضور سے کسبِ ضیا کے بعد
پھیلا رہے ہیں کب سے اجالے زمین پر
محسوس ہوتا ہوگا جدھر مصطفےٰ چلے
جیسے کسی نے مشک اچھالے زمین پر
محشرمیں بھی حضور مِرے کام آئیں گے
دیتا رہوں گا ان کے حوالے زمین پر
لاریب جگمگائیں گے زیرِ زمیں شفیقؔ
یادِ نبی میں اشک بہا لے زمین پر
شاعر کا نام :- شفیق ؔ رائے پوری
کتاب کا نام :- قصیدہ نور کا