تیری یاد وچہ جیویں گزری گزاری
نہ آیوں توں ڈھولا نہ مکدی اے زاری
میں تتڑی دے گھر وی کدی پھیرا پا جا
میرے پیار دی جھوک آ کے وسا جا
کتھے جاوے ڈھولا ایہہ درداں دی ماری
جے آکھیں وے ماہی میں جندڑی وی دیساں
توں ایناں تے کہہ چھڈ میں لگیاں بھیساں
لگی ہوئی اے میڈی ازلاں دی یاری
میں ادنی توں ادنی توں اعلیٰ توں اعلیٰ
میں نیویں توں نیویں توں بالا توں بالا
توں سب نالوں سوہناں میں سب توں نکاری
رہن سوہنے سانول دے وسدے چبارے
کدی مینڈے ویٹرے وی اک جھات مارے
دکھا دے چا مکھڑا مئے بے قراری
ایہ میری دعا ہے اوہ جگ جگ چا جیوے
اوہ مانے حیاتی سدا راضی تھیوے
مری عمر لگ جاوے سانول نوں ساری
جدوں مینوں ویکھن لئی ڈھول آوے
دعا کرناں سیو کتے مڑ نہ جاوے
میں جنس آں نکمی اوہ سوہنا بپاری
اوہ اک دن تے آوے گا ویہڑے چہ میرے
کدی میرے لیکھاں چہ ہوسن سویرے
سدا کھلی رکھنی آن یاداں دی باری
نیازی تے وی کر کرم ہن حبیبا
مینوں دارو درداں دا دے جا طبیبا
مری دن بدن ودھ دی جاوے بیماری
شاعر کا نام :- عبدالستار نیازی
کتاب کا نام :- کلیات نیازی